مميزات التمويل العقارى الجديد - مثال على التمويل العقارى
مميزات التمويل العقارى الجديد - مثال على التمويل العقارى
بالنسبة للتمويل العقارى (المبادرة ٣%متناقص) لمتوسط ومحدودى الدخل .
اولا : التمويل العقارى موجود في بنوك مصر بس الفائدة كانت كالتالي :
٨% متناقص بالنسبة لمتوسط الدخل
٧% متناقص بالنسبة لمحدودى الدخل
والبنك يمول حتى ٨٠% من ثمن الوحدة السكنية حتي مبلغ ٢ مليون جنيه حد أقصي ومساحة الوحدة السكنية بتكون ١٥٠ متر كحد أقصي
سؤال :-
المبادرة دي بتكون في أماكن معينة ؟
الجواب :-
لا متاحة لأي وحدة سكنية في اي مكان في الجمهورية
سؤال :-
التمويل دا للشقق اللي وزارة الإسكان بتنزلها في الطروحات الخاصة بيها في المدن الجديدة ؟
الجواب ؛-
لاء لأي وحدة سكنية في اي عقار ولكن العقار تكون أوراقه مسجلة بشكل قانوني والوحدة تكون مسجلة بشكل قانوني وبعد كدا حضرتك تقدم عادي جدا وتجهز الأوراق المطلوبة
سؤال :-
لو عايز ادفع ٥٠% من قيمة الوحدة والبنك يمول الباقي ينفع؟
الجواب ؛-
ايوة طبعا ينفع البنك بيمول بحد أقصى ٨٠% من ثمن الوحدة
سؤال:-
التمويل العقارى لأي شخص موظف سواء قطاع حكومي او قطاع خاص ؟
الجواب :-
طبعا لأى شخص موظف سواء قطاع حكومي او قطاع خاص او صاحب مهن حرة
سؤال :-
الأوراق المطلوبة ايه ؟
الجواب :-
١- شهادة تصرفات عقارية لصالح وضد البائع حتي اخر يومية
٢- كشف رسمى جرد للوحدة السكنية محل التمويل
٣- شهادة تفيد بعدم وجود مخالفات للوحدة محل التمويل - ولو الوحدة دي تابعة لجهاز مدينة من المدن الجديدة تاخد شهادة بالموافقة برهن الوحدة محل التمويل .
ودا اهم الأوراق المطلوبة في التمويل العقارى
بعد كدا هيكون الأوراق المطلوبة
زى
١- إيصال مرافق حديث .
٢- شهادة بمفردات المرتب من المكان اللي شغال فيه سواء قطاع حكومي او قطاع خاص او شهادة إثبات دخل لو مهن حرة .
٣- برنت من التأمينات .
٤- لو حضرتك متزوج أو متزوجة صورة بطاقة الزوجة او الزوج .
* دى الإجراءات والأوراق المطلوبة بالنسبة للتمويل العقارى الموجود حاليا بالبنوك
اللي الفائدة فيه
لمتوسط الدخل ٨% متناقصة
ومحدودى الدخل ٧% متناقصة
بالنسبة للمبادرة الجديدة (٣% متناقصة لمتوسط ومحدودى الدخل) اللي تم طرحها من ايام لسه مفيش اي منشور بيها وصل للبنوك ولكن اعتقد انها هتكون نفس الإجراءات والأوراق المطلوبة في المبادرة اللي قبل كدا .
سؤال :-
ايه الفائدة من اني اشترى شقة عن طريق التمويل العقارى ؟
الجواب :-
اوقات كتير بيكون مع حضرتك مبلغ بس متقدرش تشترى شقة ولو فكرت ان حضرتك تشترى لازم بعد فترة بسيطة تسدد باقى المبلغ ولو قسط ع كذا سنة بتكون فائدة اعلي انما التمويل العقارى بتكون الفائدة فيه اشبه بالمصاريف الإدارية ويشبه انك متأجر شقة بتنتهي بالتمليك
في بنوك بتبدأ فيها فترة التمويل من ٥ سنوات حتي ٢٠ سنة
وفي بنوك بتبدأ فيها فترة التمويل من ٧ سنوات حتي ٢٠ سنة
بالنسبة للمبادرة الجديدة هتكون فترة التمويل حتي ٣٠ سنة
سؤال ومثال :-
لو مثل هشترى شقة ومبلغ التمويل اللي انا محتاجة وليكن ١٠٠٠٠٠ج مائة ألف جنيها لو علي ١٠ سنين هيكون القسط كام ولو على ٢٠ سنة القسط كام والمالية الفائدة اللي هدفعها كام لو علي المبادرة المتاحة حاليا ، ولو علي المبادرة الجديدة ؟
الجواب :-
لو هنشتغل علي المبادرة الموجودة حاليا
هنشتغل علي قسمين :-
#لو حضرتك متوسط الدخل هتكون المبادرة ٨% متناقصة
فترة السداد هتكون ١٠ سنوات
قسط حضرتك الشهرى هيكون ١٢١٣.٢٨ ج شهرى
واجمالي الفائدة = الفائدة السنوية × عدد السنوات
إجمالي الفائدة = ٤٥٥٩.٣٦ × ١٠ = ٤٥٥٩٣.٦ ج
فترة السداد هتكون ٢٠ سنة
قسط حضرتك الشهرى هيكون ٨٣٦.٤٤ ج شهرى
وإجمالى الفائدة = الفائدة السنوية × عدد السنوات
إجمالي الفائدة = ٥٠٣٧.٢٨ × ٢٠ = ١٠٠٧٤٥.٦ ج
#لو حضرتك محدودى الدخل هتكون المبادرة ٧% متناقصة
فترة السداد هتكون ١٠ سنوات
قسط حضرتك الشهرى هيكون ١١٦١.٠٨ ج شهرى
واجمالي الفائدة = الفائدة السنوية × عدد السنوات
إجمالي الفائدة = ٣٩٣٢.٩٦ × ١٠ = ٣٩٣٢٩.٦ ج
فترة السداد هتكون ٢٠ سنة
قسط حضرتك الشهرى هيكون ٧٧٥.٣ ج شهرى
وإجمالى الفائدة = الفائدة السنوية × عدد السنوات
إجمالي الفائدة = ٤٣٠٣.٦ × ٢٠ = ٨٦٠٧٢ ج
- طيب وبالنسبة للمبادرة التمويل العقارى الجديدة
#بالنسبة بقا للمبادرة الجديدة ٣% متناقصة لكل من متوسط الدخل ومحدودى الدخل لو مبلغ ١٠٠٠٠٠ ج مائة ألف جنيها مبلغ التمويل
* فترة السداد هتكون ١٠ سنوات
قسط حضرتك الشهرى هيكون ٩٦٥.٦١ ج شهرى
واجمالي الفائدة = الفائدة السنوية × عدد السنوات
إجمالي الفائدة = ١٥٨٧.٣٢ × ١٠ = ١٥٨٧٣.٢ ج
* فترة السداد هتكون ٢٠ سنة
قسط حضرتك الشهرى هيكون ٥٥٤.٦ ج شهرى
وإجمالى الفائدة = الفائدة السنوية × عدد السنوات
إجمالي الفائدة = ١٦٥٥.٢ × ٢٠ = ٣٣١٠٤ ج
* فترة السداد هتكون ٣٠ سنة
قسط حضرتك الشهرى هيكون ٤٢١.٦ ج شهرى
وإجمالى الفائدة = الفائدة السنوية × عدد السنوات
إجمالي الفائدة = ١٧٢٥.٨٧ × ٣٠ = ٥١٧٧٦.١ ج
#دا مثال للناس اللي بتسأل عن التمويل العقارى
#تحديث
نائب محافظ البنك المركزي: الحد الأقصى لسعر الشقة في المبادرة الجديدة 350 ألف جنيه لمحدودي الدخل ومليون جنيه لمتوسطي الدخل
تعليقات